في Tahrir Sqare, Cairo, Cairo (30.044130 31.235380)
امبارح (الجمعة 25 نوفمبر) كنت فى التحرير و الدنيا كانت زحمة جدا خصوصا عند عمارات التصوير,الناس كانت واقفة تسقف و تصفر لما شافوا الظباط المنشقين,فجأة لقيت نفسي مش عارفة اعدي و لا اقف و لا ارجع ورا لأن ببساطة الرجالة حوالين من كل مكان مش سايبينلنا مكان نعدي منه و بيزقونا ويخبطوا فينا ،ماكانش في اختيار غير اننا نمشي لقدام لأن مافيش حل تاني و لا ينف نرجع ولا ينع نقف..و انا ماشية حسيت بولد ماشي وراياما بصتلهوش بس من كلامه للناس فهمت انه بيحمي ضهرناو بيوسعلنا طريق ، الولد اختفي وسط الناس و مشي وبعدها بشوية حسيت بحد بيلمس جسمي، بصيت ورايا لقيت ولد حوالي في العشرينات،زعقت و شتمته وقلت للناس اللى حواليا امسكوه ده اتحرش بيا لما بصلي كان شكله خايف بس لما الناس بصتله و مامعلوش حاجة لقيته بيمش و بيبعد حاولت اروح امسكه بنفسي لأن الرجالة اللى كانوا حواليا رجالة باللإسم بس، راجل كبير قعد يقولي اهدي احنا كلنا هنا اخواتك شفت الولد بيختفي قدام عنيا وسط الزحمة من غير ما حد يعمله حاجة كنت حاسه اني مشلولة و قعدت ازعق والراجل فضل يقوللي اهدي احنا كلنا هنا اخواتك، قلتله لو كنتوا اخواتي كنتوا مسكتوه ضربتوه مش تتفرجوا عليه، راحت ست كبيره برضه قالتي خلاص بقى امشي و كلام بمعنى ما تكبريش الموضوع، مشيت و انا بزعق لأي راجل أو ولد يقف قدامي علشان يوسعولي الطريق وطبعا كانوا فاكريني مجنونة.دي أول مرة في حياتي يحصلي موقف زي ده و ما عمري ما جه في بالي ان ممكن يحصلي في التحرير، و اتصدمت أكتر في الناس لأني اتوقعتش يبقى رد فعلهم بالبرود ده. على فكرة مش هبطل اروح التحرير ان شاء الله و بقول لأي بنت يحصلها كده ما تستناش أو تفترض الناس تساعدها، و تمسك اللى يعمل كده بنفسهاو تضربه لأن عقلية الناس في بلدنا لسه مش مستوعبة ان بنت تقول انا حداتحرش بيا
نحتاج منك تسجيل الدخول للتعليق. تسجيل الدخول من هنا.