التدخل

 في طرق كتيرة لمواجهة التحرش الجنسي لما يحصل وفي
الأوقات التانية.

جمعنا شوية أفكار هنا.


اتدخل/ي بالطريقة المناسبة ليك/ي لما تشوف/ي تحرش جنسي بيحصل قدامك

  • لو مش مرتاح/ة تتدخل/ي لوحدك/، اطلب/ي من الناس اللي في المكان تتدخل معاك/ي.
  • لو أنت/ي في مكان زحمة وشفت/ي حد بيتحرش اقف/ي في النص بينه وبين الشخص اللي بيتحرش بيه عشان تفصلهم.
  • خد/ي المتحرش على جنب وقول/ي له بهدوء "اللي بتعمله ده مش مقبول".
  • نط/ي في النص وقول/ي للمتحرش يبطل فورا.
  • اعرض/ي انك تروح/ي مع اللي حصل له/ا تحرش لعمل بلاغ في قسم الشرطة والشهادة لو كان/ت عايز/ة.
  • حاول/ي تشتيت الانتباه عن طريق سؤال المتحرش أو اللي بيتعرض/تتعرض للتحرش عن عن الوقت أو الاتجاهات.
  • اسأل/ي اللي حصل له/ا تحرش لو محتاج/ة مساعدة.
  • لو المتحرش موظف أو صاحب عمل أو في مكان مغلق، بلغ/ي الواقعة للإدارة أو الأمن وصمم/ي أنهم يأخدوا موقف ضد المتحرش.
  • لو لقيت/ي حد تاني بيتدخل ساعده/ها.


ما تسكتش/يش – اختار/ي التصرف اللي شايفه/اه مناسب ليك/ي وللموقف

  • بلغ/ي خريطة التحرش باللي حصل ومكانه وزمانه هنا أو على فيس بوك أو تويتر. كل البلاغات مش بتبين اسم الناس.
  • بين/ي اهتمامك للناس اللي عملت بلاغات – اقرا/ي البلاغات على خريطة التحرش وعبر/ي عن دعمك بضغطة واحدة.
  • اتكلم/ي عن الموضوع مع الصحاب أو القرايب أو الزمايل أو على مواقع التواصل الاجتماعي. محتاجين كل الناس تعرف حجم المشكلة وإننا مش بنتسامح مع التحرش الجنسي.
  • نبه/ي الناس لما يقولوا تعليقات أو نكت فيها موافقة على التحرش الجنسي.
  • ثقف/ي نفسك عن التحرش الجنسي وممكن تبدأ/ي بالمصادر بتاعتنا.
  • استخدم/ي الخدمات المجانية المتاحة زي الدعم النفسي والاستشارات القانونية. وفرنا قايمة هنا.
  • بلغ/ي الشرطة لأن التحرش الجنسي جريمة. شوف/ي الصفحة دي لتفاصيل أكتر عن كيفية التصرف أو اتصل/ي بنظرة للدراسات النسوية (01011910917) لاستشارة قانونية بالمجان.
  •  استخدم/ي وسائل التواصل الاجتماعي عشان ناس أكتر تعرف. تابعنا/ينا على انستجرام وتويتر  وفيس بوك وادعي أصدقاءك.


أي تحرك مهم

كل مرة بنتكلم أو نتدخل، بنثبت موقف ونشجع الآخرين إنهم يعملوا زينا.

اعرف/ي أكتر