انا طالبة في ثانوية عامة عندي 17 سنة. كان عندي درس قدام الاسكواش بتاع نادي الشمس وكنوع من الرياضة حبيت ارجع من الدرس مشي لحد شيراتون وكانت الساعة 8 تقريبا.ومن ساعةومن عند بداية سور الكلية الحربية عند الاستاد وبدات اسمع كلام قذر من كل شخص معدي او في عربية لدرجة اني وقفت لحظة ابوص على نفسي وهدومي لو فيها حاجة غلط بس ملقيتش. عند داخلة شيراتون كذا ميكروباص وقفولي فكرني عايزة اركب شاورت لأ وهنا شفت كائن قذر شكله كويس راكب عربية فيرنا نبيتي بصلي وفتح باب العربية بصيتله بصة احتقار ومشيت مضايقة اوي. بقول يعني اي واحدة ماشية بليل لوحدها المتخلفين يفكتروها بنت مش كويسة, وبعدين لقيته مشي ورايا وبيزمر اترعبت ومشيت بسرعة ناحية الشارع اللي ساكنة فيه وانا هموت لقيته داخل ورايا بس في عربية قدامه كانت نقطة الشرطة على بعد امتار ومع ذلك خفت ادخل مش عارفة ليه. بعدين لقيته قرب اوي اترعبت وجريت على الكوافير اللي كان جنبي دخلت في انهيار حكيت للولد قالي متخفيش و شاوريلي عليه وخرج وقعدت انا واتفتحت في العياط والكل بيحاول يهدي فياوانا اصلا عمري ما بعيط بسهولة واللي وجعني الستات اللي كانوا قعدين يقولوا "ايه اللي ممشيها لوحدها؟ ومفيش دخان من غير نار مش هيمشي وراها كدة من غير سبب..." بعدها بخمس دقايق رجع وقالي اوعي تخافي ووصلني لحد باب الشقة وانا مصدومة, انا عارفة ان اللي حصللي ولا حاجة بالنسبة اللي بسمعه بس انا رجعت البيت حاسة بالقهر والظلم يبقى غلطان ومحدش يقدر يكلمه وانا اللي اهرب واحس بالرعب ده؟, قعدت تيجي في دماغي اني لو كنت بعيد عن البيت او ملقتيش حد يساعدني كان ايه اللي هيحصل؟ ازاي واحدة في سني تحس انها بتكره البلد عشان مش عارفة تتمشى في الشارع وبالرغم من كل في لسه ستات بتعيب على البنت وبتبرر للولد وبتنقد خروجي الساعة8
ومن انهارده عرفت ان المشي لوحدي في الشارع بقى
حرام وجريمة يعاقب عليها المجتمع!