في Al Omraneyah, Giza, Giza (30.026030 31.200830)
انا هحكيلكم عن الموقف اللي حصل معايا : كنت واقفه مستنيه مواصله انا و اختي وواحده صاحبتي و كان في ناس طبعا واقفين جنبنا بردو المهم المواصله جت و بدأنا نركب ركبت اختي وبعدها صاحبتي وراحت مدالي أيدها عشان اركب و انا بركب بقي كان في ولد ورايا احنا كنا فاكرينه هيركب عادي بس لقيته ايديه اتمدت و انا برفع رجلي و قام خبطتي و مشي كانه معملش حاجه انا من الخضه تقريبا جالي شلل موقت كده معرفتش حتي أصوت بس صاحبتي هذا بالها من رد فعلي لما لقيتني برقت كده ولقيت الواد مشي راحت زقتني وطلعت جري ورا الواد ووراها اختي وأنا فضلت واقفه مكاني الواد لما لقاهم بيجروا وراه قام جري الناس اتلموا عليا و سالوني و هما فمكانهم كده من غير ما يتحركو وهما شايفين البنات بتجري وراه الواد !! ايه اتسرق منكم حاجه ؟! و كان ده الشي الوحيدة اللي يخلي صحابي يجرو وراه المهم انا كنت بدأت استوعب اللي حصل و جريت انا كمان ورا اختي و صحبتي الحقيقه انا كنت خايفه عليهم جداً فقعدت اقولهم تعالو خلاص مش عاوزه حاجه سيبكم منه و كلام من ده وهما منفضنلي و مستمرين وراه و هما عاملين يشتكون و الله يا ابن الكلب لا احنا اللي ضربينك و كلام من ده
كان في سلم المترو قام الواد طلع جري عليه فالوقت ده في واحد لقانا بنجري وراه قام جري معانا و لما المتحرش ده طلع جري عالسلم الولد قام قايل للناس اللي فوق امسكوه ابن الوسخه ده قام شويه شباب مسكوه و راح طلع الولد ده مسكه ضربه و نزل شتايم فيه كانت صحبتي و اختي وصلوله بقي قام مسكهلهم وقالهم اضربوه انتم عشان يتربي و فعلا صحبتي مسكت الشيشب اللي كان لابسه و نزلت بيه علي دماغه لما اتنفخ فالوقت ده انا كنت واقفه عالسلم و خايفه أتحرك خالص بس لما لقيت صحبتي بتضربه حسيت بقوه غريبه و جريت و قلت هضربه بس للأسف الواد كان فلت و فضل معانا فرده الشبشب اللي كان لابسه يعني روّح بيته حافي
انا بحكي الموقف ده عشان اتعلمت منه حاجات كتيره انا لولا ان صاحبتي الجدعه خدت بالها انا كنت هكمل و اركب عادي و حتي مكنتش هقولهم هما نفسهم !! و كان الولد هيرّوح عادي و كان مفيش حاجه حصلت
و انا الموقف هيفضل فدماغي و هحاول اقنع نفسي أني نسيته كالعاده بس من جوايه قوي عارفه أني مش ناسيه و هفضل كل ما أجي اركب مواصله جسمي يترعش و ابقي خايفه و مرعوبه من اللي ورايه
انا لأول مره احكي حاجه زي كده و اعترف بيها انا حتي كنت بنكرها بيني و بين نفسي
اول مره احس اني بطّلت خوف
انا اول مره أحس ان حقي رجعلي
انا اول مره أحس أني قويه مش ضعيفه و ان أي ابن كلب هيتعرضلي بعد كده هطلع روح أهله و هلاقي اللي يوقفلي
يوم ١٦ -٥ كانت الساعه تقريبا ١٢ عند محطه مترو جامعه القاهره
نحتاج منك تسجيل الدخول للتعليق. تسجيل الدخول من هنا.