انا من اكتوبر وفى جامعة القاهره اول مره احس انى اخدت حقى فعلا كنت فى يوم نازله الجامعه وطالعه على الشارع الرئيسى عاشان اركب كان فى شاب فى الشارع جاى من الناحيه التانيه (الساعه كانت 2 الظهر) وابتدا يقرب ويعمل حركات قزره جدا بأيده ويقرب انا مديت بس هو قرب جدا واول ما قرب منى جبت طوبه وحدفتها عليه ووقفت لحظه مش عارفه اعمل ايه ؟!! اجرى والا اصوت والا اعمل ايه ... لكن فى لحظه لقيتنى بجرى ناحيته وهو اما لقانى بجرى ناحيته طلع يجرى طلعت اجرى وراه واقول حرامى ... لآن طبعا دى جملة الاستغاثه الوحيده فى مصر .... ولآنى لو قلت الحقونى او اى حاجه اول حاجه الناس هتعملها هتيجى تقولى هو عمل ايه .... وعلى ما احكى والناس تستوعب هتكون خربت مالطا

طلعت اجرى لحد ما تعبت وانا بقول حرامى المهم هو اخد باله انى وقفت وراح مكمل مشى عادى خصوصا ان الشارع كان فاضى .... الناس اتلمت بعد ما وصل لآخر الشارع وقالولى فى ايه وهو فين قلتلهم اخر الشارع ولابس كزا .... اخدوا عربية جارنا وراحو وراه جابوه واول ما شفته قلتله انا هعملك محضر .... قالولى قولى الحق هو سرق منك حاجه ؟؟ قلتلهم لا هو عمل كزا كزا ومعرفتش استنجد بحدغير اما اقول كده وانا لازم اعمله محضر

طلعت اجيب البطاقه ونزلت لقيتهم ضاربينه وعمال يعيط ويقولى انا اسف حقك عليا .... والناس يقولولى معلش سامحيه قلتلهم ده مش عيل صغير عاشان اقول ماكنش اصده

المضحك فى الموضوع ان وانا بضربه لقيت الناس بتقولى (لا الضرب ع الوش حرام )...هههههه لا بجد ؟ انتو بتهرجوا صح ؟

انا دايما بقول لاى واحده متسبيش حقك حتى لو انتى مش قويه حقك هيخليكى تكونى قويه ... مش انتى اللى لازم تخافى هو اللى لازم يخاف لآنه بيسرق حاجه مش من حقه لأن هو اللى غلط

ناس كتير قالتلى مفيش بنت تمد ايدها على راجل بس انا بقول لو كل الناس اخدت موقف الاشكال الضاله دى هتختفى مع الوقت السكوت هو اللى خلاها تكتر .. واذا كان هو بيدى نفسه الحق يمد ايده على جسمى فا من حقى امد ايدى على وشه وعلى افاه