at كوبري الدقي, Giza, Giza (30.037630 31.207070)
من حوالي سنة, ركبت انا وصحبتي ميني باص من الكلية للهرم عشان نروح .. ابتدينا نحس بحاجة غريبة .. كان في شخص قاعد ورانا وحاطط جاكيت على ايده وكان في فتحة في الكرسي بين المسند والمقعد .. معرفناش نعمل حاجة غير اننا حطينا الشنط ورا ضهرنا .. راح قعد ورا بنت تانية كانت نايمة راحت صاحبتي صاحتها عشان تاخد بالها .. المتحرش الجبان اول ما شاف صاحبتي بتكلم البنت اتخض ووقف كأنه خلاص نازل .. بعد فترة وكالمعتاد بركب الميني باص وانا مروحة لقيته قاعد ورا بنت برده ومخبي ايده بالجاكيت .. طبعا نزلت جري
امبارح ركبت ميني باص ولقيته بس ماكنتش متأكدة انه هو .. قعدت في كرسي وحطيت الشنطة على الكرسي اللي جنبي عشان محدش يقعد .. طلعت بنت راح قام عشان تقعد في الكرسي اللي جنبه
وابتدت القذارة .. ابتدى يمد ايده على البنت وهو
مغطيها بالجاكيت
معرفتش اعمل ايه .. استنيت البنت تقوم .. خفت عليها, انا عارفة الاحساس المقرف ده .. اكيد مصدومة ومش عارفة تعمل ايه
كان لازم اتصرف والا هكون زيه بس كنت خايفة
كان في "راجل" قاعد ورايا روحت قولتله "الراجل ده مش كويس و بيعمل حاجة مش كويسة في البنت ممكن تساعدها؟"
بص على المتحرش راح قاللي "هي اللي قعدت جنبه" !!!!!!!!
قولتله هي اكيد متعرفش .. قاللي طب تناديلها طيب وللا ايه؟
انا كنت بترعش وحزنت على "الراجل" اللي مش راجل ده كمان
الحمدلله ان كانت النتيجة كويسة ان المتحرش خد باله اننا بنتكلم عليه وعشان هو جبان راح قام ونزل
قعدت جنب البنت وكنت عايزة اتكلم معاها بس سكت .. نزلت هي وانا بكيت على اللي احنا فيه .. الرجالة مبقوش رجالة, متحرشين او غير متحرشين
Sorry, you need to be logged in to comment. Log in here.