اللى بيركب الباص ده فاهم كويس اللى بتكلم عليه. ببساطة انا فى اربع سنين الكلية حفظت اشكال ما لا يقل عن 10 متحرشين كل اللى بيعملوه انهم يركبوا يتحرشوا وينزلوا فى أماكن مختلفة على حسب عملوا اللى هما عاوزينه وللا لسة. والحمدلله أنا وأصحابى لما بنشوف أى واحد منهم بنفضل باصين عليه علشان مايضايقش البنت اللى قاعدة جنبه، بس لو ده مفرقش معاه مبنسكتش. المتحرشين لما بيركبوا مبيفرقش معاهم اللى قاعدين جمبها محجبة منقبة أو مش محجبة. كل اللى هما محتاجينه هو جسم واحدة هتتكسف وتسكت وعين تشوف اللى هما بيبينوه. فطبعا مش محتاجة اقول ان حجة هى اللى لابسه كدة علشان تتعاكس باطلة.
الخلاصة ان بجد انا فى الاربع سنين دول عرفت ان المتحرش هو اجبن كائن على وجه الارض. من مجرد بصًه من بنت باحتقار بيسيب المكان وينزل، طب لو هزأته و مسكتلوش برده بيطلع يجرى. محدش يسكت على التحرش، اللى عامل حاجة غلط بيبقى اجبن من انه يدافع عن نفسه. حتى لو محدش هيقف جمبك، انتى لوحدك قادرة على انك تاخدى حقك!!