Report View
Incident happened on 13/01/2011 at 2:50PM
at No Address, Alexandria, Alexandria (31.225130 29.943240)
انا كل يوم يحصلى تحرش بكل نوع خلا ص زهقت من البلد دى و كرهتها و كرهت الناس اللى فيها لدرجة انى بفرح فى مشاكل الشعب ده
المهم هحكلكم على اخر واقعة ليا و كانت امبارح فى المكروباص اللى رايح من محطة مصر الى رشدى اسكندرية .... انا ركبت فى اخر كرسى جنب الشباك و جه راجل قعد جنبى بصراحة شكله مش بيوحى بحاجة شكله فوق ال 30 سنة و عنده شنب و لابس جاكيت و فرده جانبه بعد شوية حسيت بايد بتلمسنى بصيت عليه لقيته حاطط ايد على الكرسى اللى امامه و ماسك بها جرنال و ايده التانية مش عارفة فين اتضحلى بعد كده انه حططها جوه الجاكيت و جايبها من نحيتى و بيلمسنى بيها يعنى مداريها تحت الجاكيت .. المهم انا بينت جدا انى حاسة بان فى حاجة جانبى غلط لكن هو كان مستمر برضه فى قلة ادبه دى معرفتش اتكلم و حسيت بعجز و قهر و بكل صراحة انا معنديش الجرأة انى اتكلم لان لو قولت للناس اللى حواليا ان فى راجل بيتحرش بيا احتمال يكذبونى و يشتمونى و حصلت لصحباتى قبل كده و حتى لو صدقونى مش هيعملوا حاجة ..لما نزل من المكروباص و هو نزل فى منطقة قبل اللى انا نازلة فيها المهم شوفته بيطلع ايده من جوه الجاكيت و لما نزل لقيته بصلى و ابتسم ابتسامة كأنها ابتسامة انتصار و كأنه بيقولى برضه معرفتيش تعملى حاجة .. المهم انا عايزة اسأل هو باللى عملوا ده دى اشبع رغباته القذرة ولا هو تعمد يعمل كده عشان يستفزنى و يقهرنى لمجرد انى أنثى
انا تعبت من المجتمع ده اللى مش بيحترم ادمية المرأة و كيانها و كأنها مجرد جسد ماشى
و برضه عايزة اقول ان الخطاب الدينى يحمل جزء من اللى بيحصل فى المرأة لما يطلع شيخ يصف المرأة على انها قطعة لحمة لازم تحتشم حتى لا تنهشها العيون
لا انا مش لحمة انا انساااااااااااااانة
Sorry, you need to be logged in to comment. Log in here.