نصائح عن كيفية التدخل

13016430_1122391341157291_1060661766_o

 في طرق كتيرة للتصدي للتحرش، جمعنا هنا بعض الأفكار.

إنك تتدخل بأي شكل من الأشكال لما تشوف جريمة تحرش جنسي بتحصل قدامك

  • لو انت في مكان زحمة وشفت حد بيحاول يتحرش اقف في النص عشان تعزلهم ( أو تفصل بينهم)
  • لو قلقان من التدخل نادي على حد يساعد
  • قول للمتحرش “اللي بتعمله ده مش مقبول هنا وأحسنلك تمشي”
  • خد المتحرش على جنب وقوله عيب اللي بتعمله ده
  • زعق في وش المتحرش وقوله اللي بتعمله ده ما ينفعش
  • اعرض موافقتك على الشهادة في القسم
  • حاول تشتيت المتحرش بسؤاله عن الوقت أو الاتجاهات
  • اسألي المتحرش بها لو محتاجة مساعدة
  • بلغ ادارة المكان لو شفت او اتعرضت لتحرش جنسي من أحد الموجودين

ماتسكتش – اعمل اللي انت شايفه مناسب للموقف

  • رد واتكلم بصوت عالي وقول لأ لو اتعرضت أو اتعرضت بنت قدامك للتحرش، ممكن برضه تطلب المساعدة من الناس الي حواليكي في الشارع.
  • ابعت لخريطة التحرّش وقولنا إيه الي حصل، إمتى وفين برسالة قصيرة على 6069، أو من خلال الإيميل أو تويتر أو على موقعنا أو الفيسبوك، كل التقارير الي بتجيلنا مش بتظهر اسم المرسل.
  • اتكلم عن اللي حصلك مع أصحابك وعيلتك وقرايبك، أو اكتب على الفيسبوك وعلى تويتر، محتاجين كل الناس تعرف حجم المشكلة وإنها بتحصل لكل الستات والبنات الي حواليهم.
  • استخدم الخدمات المجانية المتاحة من دعم نفسي ومساعدة قانونية، ممكن تتصل بنظرة للدراسات النسوية (01011910917) وتعرفي معلومات أكثر.
  • اعمل محضر في قسم الشرطة ده حقك وفي قوانين ممكن تستخدم لإدانة المتحرش، تابع الصفحة دي عشان تعرفي معلومات أكثر عن كيفية عمل   محضر، أو اتصلي بنظرة للدراسات النسوية (01011910917) للدعم القانوني المجاني
  • خد درس دفاع عن النفس، ده حايساعدك انك تتصدي للتحرش والاعتداء الجنسي لو حصلك أو حصل لغيرك.

كل فعل إيجابي نعمله مهم

  • كل مرة تتكلم فيها وتقولي لأ للمتحرش في حد حايشوفك ويفكر يعمل أو تعمل كده المرة الجاية، كمان المتحرش حايعرف إن ماحدش حايعديهاله بسهولة لو فكر يتحرش تاني
  • كل تقرير بييجي على خريطة التحرّش هو دليل على حجم مشكلة الاعتداء والتحرش  في مصر، ده بيعكس قد إيه بيأثر التحرش في كل المجتمع، وإن فيه كتير مننا مش حايسكتوا بعد كده، التقارير الي بتجيلنا مهمة وبتساعدنا في حملاتنا الإعلامية وفي نشاط التواصل المجتمعي.
  • كل مرة نتكلم على واقعة تحرش جنسي حصلت لنا أو لحد نعرفه، بنعرف الناس قد إيه المشكلة بتحصل لنا كلنا، وإن مش عيب نتكلم عن الي بيحصل لنا وإن كل الناس ممكن تلعب دور في محاربة التحرش.
  • كل محضر شرطة بيتعمل لمتحرش بيثبت إن التحرش والاعتداء الجنسي جريمة.