silhouettes-616913_640

لحد امتى هيفضلوا كده

لحد امتى هنفضل في مجتمع ذكوري بيقيد وبيمنع حركة البنات والستات في المجال العام؟ لحد امتى هيفضل الرجالة في مصرعايزين البنات والستات يخرجوا في اوقات معينة ويلبسوا لبس معين وتمشي بطريقة معينة؟ لا وكمان يتحرشوا بيهم ويمارسوا عنف ضدهم وهما عارفين كويس جدا هما بيوجعوهم ازاي وبرضو بيعملوه!

حسب دراسة خريطة التحرش في عام 2014، لقينا ان 95% من الستات والبنات اتعرضوا للتحرش الجنسي و 77% من الرجالة قالوا انهم فعلا سبق واتحرشوا. طيب ياترى الرجالة عارفين ايه الاثار النفسية اللي ممكن تحس بيها الست او البنت بعد تعرضها للتحرش وايه هي النتائج المترتبة على كده؟ بالتأكيد هما عارفين وده كان باين من كلامهم لما اتسألوا في المناقشات عن ايه هي المشاكل النفسية اللي ممكن تحصل للستات او البنات بعد تعرضها للتحرش وازاي تعرضهم للتحرش ممكن يغيير من حياتهم وعلى الرغم من كده برضو قالوا انهم بيتحرشوا. فهنلاقي مثلا انهم قالوا حاجات ليها علاقة بالخوف والأكتئاب وفقد الثقة في الاخرين زي:

أ.م. 36 سنه من حلوان قال “ممكن يعملها عقدة انها متعرفش تتعامل مع الناس، يعني مثلا لو واحد يكلمها عادى تفتكره بيتحرش بيها وممكن تعملها مصايب، فطبعا اثارها النفسية مش كويسة كل مابتزيد كل ما ممكن تعملها مصايب.”

ع.ي. 18 سنه من امبابة قال “اللى بيتحرش بياخد حاجة مايعرفش ان هو بيموتها جوه بنى ادم وبيعذبه قد ايه، كده بيقضى عليه ومش بياخد تجيله عقد نفسيه بنتشر خوف جامد بتهين كرمته جوه المجتمع وبتققل قيمته، كل حاجة بتضيع قدام عنيه”.

أ.م. 26 سنه من حلوان قال ” زي ما قولتلك اقوى مشكلة الاكتئاب انها تتعب نفسيا تخاف تتعامل مع اي حد بعد كده”. مش بس كده، لا وكمان هما عارفين ان البنات والستات ممكن يفكروا كل يوم وهما نازلين هيلبسوا ايه وهيمشوا منين وهيركبوا ايه وايه تاني ممكن يعملوه لدرجة انهم ممكن يقرروا ما يروحوش الشغل ولا المدرسة او الجامعة علشان محدش يتحرش بيهم.

ر.م 22 سنه من مصر القديمة قال: ” يعني البنت بقيت عارفه “انا نزله فين؟” سؤال بتسأله قبل مابتنزل و”انا نازله وهاشوف مين؟” و”هاروح ازاي” دي 3 أسئله اللى بتسألهم لنفسها قبل ما تنزل، عندها لبس لكل حته.”

م.م. 22 سنه من مصر الجديدة قال: “هيأثر في الشغل ان هي ممكن ماتنزلش تشتغل عشان في رجالة في الشغل فهيأثر في حياتها كلها كموقف.”

طيب ودلوقتي بعد ماورتكوا شوية امثلة صغيرة على التناقض اللي موجود عند الرجالة المصريين، تفتكروا امتى ممكن يتغيروا ويبطلوا يتحرشوا؟ وامتى ممكن يفكروا قبل مايتحرشوا في الأضرار والالام اللي بتحس بيها البنات والستات بسبب تعرضهم للتحرش الجنسي؟

إيناس حمدي

facebooktwitterlinkedin Sharing is Caring - شير في الخير

Leave a Reply

Your email address will not be published. Required fields are marked *